22 январь куни Вазирлар Маҳкамасининг йўловчи ташиш билан шуғулланувчи корхоналар учун рейтинг тузиш тўғрисидаги қарори эълон қилинди. Унинг мақсади транспорт тизимида шаффофликни ошириш ва яширин иқтисодиётга қарши курашиш, шунингдек, соғлом рақобатни рағбатлантириш ва ишончли ташувчиларни қўллаб-қувватлашдан иборат.
Баҳолаш мезонлари компаниянинг ишлаш муддати, автомобиллар паркининг ёши, электр транспорт воситаларининг улуши ва бошқа кўрсаткичларни ўз ичига олади. Компаниялар рейтингда олган баллари сонига қараб А, Б ва C тоифаларига бўлинади. Рейтингни ҳисоблаш учун маълумотлар ҳар чоракда Ички ишлар, Соғлиқни сақлаш вазирликлари ва Кадастр агентлигининг йўл ҳаракати хавфсизлиги ахборот тизимларидан «Ўзтранс» платформасига келиб тушади.
Рейтинг ҳар ойнинг 10 санасигача Транспорт вазирлиги томонидан эълон қилинади. Тизим 1 февралдан ишга туширилиши режалаштирилган, у 2024 йил охиригача тест режимида ишлайди.
