Сурхондарё вилоятида экология қонунчилиги талабларини бузган иккита корхона фаолияти тўхтатилди. Бу ҳақда Экология вазирлиги матбуот хизмати хабар берди.
Режадан ташқари текширувлар давомида «Бойсун туман йўллардан фойдаланиш корхонаси» асфальт ишлаб чиқариш корхонасида чанг ва газ тозалаш ускуналари яроқсизлиги, чангни йиғиш фильтрлари ва сув кабиналари (сув пуркаш орқали чангни йиғувчи ускуналар) ўрнатилмагани маълум бўлди.
«Шеробод туман йўллардан фойдаланиш корхонаси»да чанг ва газ тозалаш ускуналари эскиргани сабабли атмосферага меъёрдан ортиқ зарарли чиқиндилар чиқарилган.
Мазкур заводларга нисбатан Маъмурий жавобгарлик тўғрисидаги кодекснинг 86-моддаси (фойдаланиш қоидаларини бузиш, шунингдек, атмосферага чиқинди газларни тозалаш ускунасидан фойдаланмаслик) билан баённомалар тузилди.
Аниқланган камчиликлар бартараф этилгунга қадар ва фильтрлаш ускуналари ўрнатилгунга қадар корхоналар фаолияти 10 кунга тўхтатилди.
