Хабарда таъкидланганидек, ўзгаришлар соҳага сармоя киритишни рағбатлантиришга қаратилган. Шу мақсадда «Дори воситалари ва фармацевтика фаолияти тўғрисида»ги қонунга дори моддаларини (субстанцияларни) давлат рўйхатидан ўтказиш тартибининг бекор қилинишини назарда тутувчи ўзгартириш киритилмоқда.
«Гиёҳвандлик воситалари ва психотроп моддалар тўғрисида»ги қонунга юридик шахсларга IV рўйхат доирасида Вазирлар Маҳкамаси томонидан белгиланадиган айрим прекурсорларни тегишли лицензияларга асосан ишлаб чиқариш ва тайёрлаш ҳуқуқини берувчи ўзгартириш киритилмоқда.
Қонун Соғлиқни сақлаш вазирлигига дори воситаларини рецепт бўйича ёки рецептсиз сотиладиган дори воситаларига таснифлаш тартибини тасдиқлаш ваколатини беради.
Шунингдек, шифокорнинг рецепти билан ёки рецептисиз бериладиган дори-дармонлар тўғрисидаги маълумотларни кўрсатиш талабини жорий этиш режалаштирилмоқда. Дори воситаси бўйича ахборотни уларнинг тиббиётда қўлланилишига доир йўриқномаларда ҳамда Тиббиёт амалиётида қўлланилишига рухсат этилган дори воситалари, тиббий буюмлар ва тиббий техникани давлат реестрида кўрсатиш талабини жорий этувчи ўзгартиришлар киритилмоқда.
