23 апрель куни Навоий вилоятида икки нафар мактаб ўқувчиси ҳалок бўлган йўл-транспорт ҳодисаси содир бўлди, деб ёзади Kun.uz манбаларига таяниб.
Воқеа 23 апрель куни Навоий вилоятининг Нурота туманида содир бўлган. Маҳаллий 11- ва 5-сонли мактабларнинг 8-9-синф ўқувчиларидан уч нафари бошқа бировнинг «Матиз» машинасида сайрга чиқишга қарор қилишган. Автомобилни ҳайдовчилик гувоҳномасига эга бўлмаган вояга етмаган шахс бошқарган.
Аниқланишича, вояга етмаган бола автомашина бошқарувини йўқотиб қўйган, натижада ЙТҲ содир бўлган. Икки ўсмир воқеа жойида вафот этди, яна бири оғир тан жароҳатлари билан реанимацияга ётқизилди.
Ҳозирда автомобиль эгасининг шахсини аниқлаш бўйича дастлабки тергов ҳаракатлари олиб борилмоқда.
Ҳуқуқ-тартибот идоралари ходимлари ҳодиса тафсилотларига аниқлик киритмоқда.
