Коррупцияга қарши курашиш агентлиги матбуот хизмати хабарига кўра, кадастр соҳасидаги коррупция жиноятлари учун муқаддам судланган шахслар яна шу каби жиноятларни содир этаётгани аниқланган.
«Давлат фуқаролик хизмати тўғрисида»ги қонуннинг 28-моддасида коррупцияга оид жиноятларни содир этишда суд томонидан айбдор деб топилган шахслар давлат фуқаролик хизматига қабул қилиниши мумкин эмаслиги қатъий белгилаб қўйилган. Шундай бўлсада, кадастр соҳасида муқаддам судланган шахслар фаолият олиб бораётгани ва яна такрор жиноятлар содир этаётгани аниқланди.
«Биргина фирибгарлик йўли билан пора беришга далолат қилиш ва пора бериш жиноятини содир этган 127 нафар шахснинг 33 нафари ёки 26 фоизи муқаддам шу каби жиноятларни содир этгани учун судланган», — дейилади агентлик хабарида.
Коррупция ҳолатларининг олдини олишга қаратилган кўплаб чора-тадбирларга қарамасдан, кадастр соҳасида ҳамон коррупциявий омиллар ва хавф-хатарлар сақланиб қолмоқда, дейилади ҳисоботда.
Таҳлиллар кадастр соҳасидаги коррупциявий жиноятларнинг аксарияти хизмат мавқеидан фойдаланиб фирибгарлик қилиш, мансаб сохтакорлиги ва ҳокимият ёки мансаб ваколатини суиистеъмол қилиш йўналишларида содир этилаётганини кўрсатган.
Қайд этилишича, кадастр тизимида фаолият олиб борувчи ўзини ўзи таъминлашга ихтисослаштирилган Давлат кадастрлари палатасининг ҳуқуқий мақоми, мажбуриятлари, назорат механизмлари аниқ белгиланмагани соҳада коррупциявий жиноятларнинг ортишига сабаб бўлмоқда.
Кадастр соҳасида фирибгарлик йўли билан пора беришга далолат қилиш ва пора бериш жиноятлари осон мулкий даромад орттириш мақсадида ишончни суистеъмол қилиш билан боғлиқ ягона усулда содир этилган. Мансаб мавқеини суиистеъмол қилиш йўли билан талон-торож қилиш жиноятлари турли хилдаги коррупциявий схемалар асосида амалга оширилган.
Аниқланишича, ер ажратиш тартибини бузиш, қонун бузилиши ҳолатларига эътибор бермаслик, содир бўлган воқеа юзасидан ҳуқуқни муҳофаза қилувчи органларга хабар бермаслик ҳолатлари бўйича жиноятлар содир этилган.
Фуқароларнинг жиноят содир этишига шахсий манфаат, осон пул топиш, улар ўртасида мунтазам тушунтириш ва тарғибот ишлари олиб борилмаётганлиги, салбий оқибатларини тушунмаслик сабаб бўлмоқда.
Ўтказилган тадқиқот ва таҳлиллар натижаларига кўра, коррупцияга қарши курашиш агентлиги томонидан Иқтисодиёт ва Молия вазирлигига мазкур тизимда коррупцияни келтириб чиқараётган сабаб ва шарт-шароитларни бартараф этиш бўйича чора-тадбирлар кўрилгани тўғрисида ҳисобот юборилди.
