Бош вазир Саймон Харрис Ирландия Фаластинни мустақил давлат сифатида тан олганини эълон қилди. Унинг сўзларига кўра, Испания ҳам шундай қарорга келган, деб ёзади Ириш Тимес. Испания бош вазири Педро Санчес буни тасдиқлаб, қарор 28 майдан кучга киришини айтди.
Қайд этилишича, Харрис Фаластинни тан олишни у билан Исроил ўртасидаги «тинчлик сари ягона барқарор йўл» деб атаган ва бу ечим икки давлат келишувига эришишни осонлаштириши кераклигини айтган. Ирландиянинг собиқ бош вазири Мишел Мартинга кўра, бу «тарихий лаҳза» ва фаластинликлар ўз тақдирини ўзи белгилаш ва давлатчилик ҳуқуқига лойиқдир. Унинг таъкидлашича, Ирландия Исроил ва Фаластин ҳуқуқларини тенг тан олади ва бу қарор Исроил томонига нисбатан «душманлик ҳаракати» сифатида қабул қилинмаслигига умид қилади.
Санчес Испания Фаластинни «тинчлик, адолат ва тотувликка эришиш учун» тан олганини ва бошқа Европа давлатлари Мадриддан ўрнак олишига ишонч билдирди: «Биз қанча кўп бўлсак, сулҳга тезроқ эришамиз». Унинг қўшимча қилишича, қарор Исроилга қарши ёки ҲАМАСни қўллаб-қувватлашга қаратилган эмас.
Маълумотларга кўра, Норвегия аввалроқ Фаластинни тан олганини эълон қилган. Бош вазир Жонас Гаҳр Стёрнинг сўзларига кўра, бу Яқин Шарқда тинчлик ўрнатилишига ҳисса қўшади ва қўшимча равишда Осло «Фаластин давлатини жавобгарликка тортиш» имкониятига эга бўлади.
Исроил бунга жавобан Ирландия ва Норвегиядаги элчиларини маслаҳатлашувлар учун чақириб олишга қарор қилди.
«Исроил ўз суверенитетига путур етказадиган ва хавфсизлигига таҳдид солаётганлар олдида жим турмайди», — деб ёзади Исроил ташқи ишлар вазири.
У Фаластиннинг тан олинишини ҲАМАС ҳужуми қурбонлари хотирасини ҳақорат қилиш деб атади.
Норвегия, Испания ва Ирландиядан ташқари, БМТнинг 193 аъзосидан 143 таси Фаластинни давлат сифатида тан олган. 1948 йилда Исроил мустақиллиги эълон қилинди ва 1949 йилда яҳудий давлати БМТнинг тўлиқ аъзоси бўлди.
Европа дипломатияси раҳбари Жозеп Боррелнинг айтишича, май ойи охиригача Европа Иттифоқининг бир қанча давлатлари Фаластинни тан олади.
