5 июндан бошлаб абитуриентлар my.uzbmb.uz сайтида онлайн рўйхатдан ўтишлари мумкин. Рўйхатга олиш эрталаб очилиши керак.
Президент қарорига кўра, 2024 йилда биринчи марта ўқишга қабул қилиш «аввал тест, сўнг саралаш» тамойили бўйича икки босқичда амалга оширилади.
Даставвал абитуриентлар 5 июндан 25 июнгача тест синовларида қатнашиш учун рўйхатдан ўтади. Шу билан бирга, улар фақат тест синовлари учун фанлар тўпламини, ўқитиш тилини ва тест синови ўтказиладиган ҳудудни танлайди. Агар кириш имтиҳонлари касбий (ижодий) имтиҳонни ўз ичига олган бўлса, ушбу имтиҳонни топшириш учун давлат олий таълим муассасаси ҳам танланади.
Биринчи босқичда маълум бир олий таълим муассасаси танланмайди. Абитуриентлар фақат тест фанлари, тили ва ҳудудини белгилайди. Имтиҳонлар июль-август ойларида ўтказилади. Иккинчи босқичда эса абитуриентлар тест синовларидан ўтгандан кейин 15 кун ичида олий таълим муассасаси, бакалавриат йўналиши ва ўқиш шаклини танлайди.
Тест синовларидан ўтгандан сўнг тўпланган баллга қараб, абитуриентлар кириш учун университетни танлайди. Ўйлаш ва таҳлил қилиш учун 15 кун вақт берилади.
