Жорий йилнинг апрель-май ойларида ўтказилган «Ўзбекистонда фуқаролар коррупция тўғрисида» социологик сўровига кўра, мамлакатда энг коррупциялашган соҳалар соғлиқни сақлаш ва таълим соҳаларидир.
Тахминан ҳар бешинчи респондент коррупцияга дуч келган. Респондентларнинг аксарияти (91,2%) бу ҳодисага ўта салбий муносабатда.
Сўров иштирокчиларининг деярли ярми Ўзбекистонда коррупция даражаси ўртача даражада, деб ҳисоблайди. Шунга қарамай, респондентларнинг 18,9 фоизи коррупция кенг тарқалганини таъкидлайди.
Кўпинча фуқаролар коррупцияга қуйидаги соҳаларда дуч келишади:
соғлиқни сақлаш;
мактабгача, мактаб ва олий таълим;
илмий ва инновацион фаолият;
қурилиш;
ҳуқуқ-тартибот идоралари;
бандлик ва камбағалликни камайтириш органлари.
Респондентларнинг 46,3 фоизи коррупцияга қарши ислоҳотларни самарали деб ҳисоблайди. Респондентларнинг 26,9 фоизи кўрилаётган саъй-ҳаракатларга қарамай, мамлакатда коррупция даражаси ўсишда давом этмоқда, деб ҳисоблайди.
Ўзбекистонда пора жамият томонидан одатий ва зарурий нарса, муаммоларни ҳал қилишда ёрдам учун миннатдорчилик шакли сифатида қабул қилинади. Респондентлар пора бериш сабаблари орасида бюрократик муаммолардан қочиш истаги, муаммоларни қонуний ҳал қилиш учун вақт йўқлиги, шунингдек, айрим вазиятларнинг умидсизлигини кўрсатган.
