Тошкент метрополитенининг «Милий боғ», «Ғафур Ғулом», «Ўзбекистон», «Юнус Ражабий» ва «Машинасозлар» бекатларининг иккинчи кириш-чиқиш йўллари ҳали ҳам тўсиб қўйилган, деб ёзади Kun.uz.
Тошкент метрополитени қошида очилган «Тошметротранс» МЧЖ лойиҳа институти томонидан барча ёпиқ вестибюлларни ишга тушириш бўйича лойиҳалар ишлаб чиқилиб, давлат экспертизасига топширилган. Ҳозирга келиб, лойиҳалар бўйича тегишли хулосалар олинган бўлиб, қурилишни амалга оширувчи ташкилот аниқланиши учун бу лойиҳа тендерга жойлаштирилгани маълум қилинди.
Шундан сўнг масъуллар барча ёпиқ қабулхоналар 2024 йилнинг майигача, эксперт хулосасидан сўнг, босқичма-босқич реконструкция қилиниб очилишига ваъда беришди. Бироқ шу кунгача қабулхоналарнинг бирортаси ҳам очилмаган.
«Тошкент метрополитени» акциядорлик жамияти вазиятга изоҳ берди.
«Бу жараён босқичма-босқич шаклда амалга ошишини инобатга олган ҳолда, қурилиш ишлари яқин бир ой муддатда бошланади. Қурилишнинг тугаш муддати хусусида эса қурилиш жараёнларининг техник ҳолатига кўра қўшимча маълумот тақдим этилади», — дейилади хабарда.
Шунингдек, «Халқлар дўстлиги» бекатидаги мавжуд эскалаторни янгисига алмаштириш мақсадида ёпилган иккинчи вестибюлда ишлар амалга оширилаётгани, унинг фаолияти бир ой муддатда қайта йўлга қўйилиши айтилди.
