Кечаси ижтимоий тармоқларда Қўйлиқ-5 турар-жой массивида суратга олингани айтилаётган видео тарқалди. Қайд этилишича, пичоқбозлик оқибатида икки киши ҳалок бўлган. Ички ишлар бош бошқармаси вазиятга изоҳ берди.
Қайд этилишича, воқеа 3 июль куни соат 23:00 да Сергели тумани Қўйлиқ-5 даҳасида содир бўлган.
Фуқаролар К.Ф., Б.А., Т.Ж., Ф.Р., И.У. ва бир-бирини таниган Б.П.лар оғзаки келишмовчиликлар туфайли жанжаллашиб қолган.
Можаро оқибатида 3 нафар фуқаро тиббий ёрдамга мурожаат қилган. Ҳозирда уларнинг аҳволи қониқарли. Вафот этганлар ва жиддий жароҳатлар йўқ.
Мазкур ҳолат юзасидан Сергели тумани ИИБ ҳузуридаги тергов бўлими томонидан Ўзбекистон Республикаси Жиноят кодексининг 277-моддаси («Безорилик») билан жиноят иши қўзғатилган. Тергов давом этмоқда.
