Туркия аэропортларида янги хавфсизлик текшируви қоидалари жорий этилди. Энди божхоначилар нафақат багажни, балки йўловчиларнинг электрон қурилмаларини ҳам текширади. Тақиқланган нарсалар жойида мусодара қилинади, деб хабар беради Anadolu агентлиги.
4 июль куни мамлакат парламенти фуқаро авиацияси тўғрисидаги қонунга киритилган ўзгартишларни қабул қилди. Янги қоидаларга кўра, аэропортга кириш ва самолётга чиқишдан олдин барча йўловчилар ва уларнинг юклари махсус жиҳозлар ёрдамида текширилади. Агар ускуна тақиқланган нарсаларни аниқлай олмаса, текшириш қўлда амалга оширилади. Агар йўловчи тинтувдан бош тортса, у аэропортга киритилмайди ва самолётга чиқолмайди. Тақиқланган нарсалар топилса, қурилмалар дарҳол мусодара қилинади.
Тинтув ишлари ҳуқуқни муҳофаза қилувчи органлар назорати остида хусусий қўриқчилар томонидан амалга оширилади. Бу хавфсизликни таъминлаш ва ҳаво кемалари, авиация объектлари ва одамларга нисбатан ноқонуний хатти-ҳаракатларнинг олдини олиш учун зарур ҳисобланади.
