Истанбулда 10 йилдан ортиқ қидирувда бўлган ўзбекистонлик автомашина фирибгар қўлга олинди, деб хабар бермоқда мамлакатнинг Истанбулдаги Бош консуллиги матбуот хизмати.
Жорий йилда Ўзбекистон ва Туркия Ички ишлар вазирликлари ҳамкорлигида ўтказилган тезкор тадбир давомида 1979 йилда туғилган Жаҳонгир Ҳасанбоев исмли шахс қўлга олинди.
«2014 йилдан бери у автомобиллар олди-сотдиси соҳасида кўплаб фирибгарлик жиноятларини содир этганликда айбланиб, қидирувда эди», — дейилади Бош консуллик хабарида.
Туркия ҳукумати Ҳасанбоевни депортация қилди. Ишнинг бошқа тафсилотлари келтирилмаган.
Фирибгарнинг қилмишидан жабрланган фуқаролардан Ўзбекистоннинг Истанбулдаги Бош консуллигига ёки Ички ишлар вазирлигига мурожаат қилишлари сўралади.
