Сурхондарё вилояти Бойсун туманидаги «Кўлқамиш» маҳалласи аҳолиси маҳаллий кондан водород сулфид сизиб чиққани туфайли кўчирилди. Бу ҳақда Ўзбекистон Фавқулодда вазиятлар вазирлиги хабар берди.
Ҳодиса 1 сентябрь куни кундузи «Мустақилликнинг 25 йиллиги» конининг 604-рақамли қудуқъида иш олиб борилаётганда юз берди. Аварияга технологик жараённинг бузилиши сабаб бўлган.
«Кон яқинида истиқомат қилувчи фуқаролар хавфсиз ҳудудга кўчирилди. Ҳалок бўлганлар ва жабрланганлар йўқ. Вазият тўлиқ назорат остида», — дейилади ФВВ хабарида.
Маҳаллий ҳокимият ёниб кетган бурғулаш қурилмаси акс этган суратларни тарқатди. Бироқ Сурхондарё вилояти ҳокимлиги ёнғин аллақачон ўчирилганини маълум қилди.
Вилоят ҳокими Улуғбек Қосимов воқеа жойига дарҳол етиб бориб, мутахассислар билан бирга зарарли моддалар чиқиши оқибатларини бартараф этишда иштирок этмоқда. Ҳаво ифлосланиши даражасини ўрганиш ва келажакда бундай ҳолатларнинг олдини олиш бўйича ишлар олиб борилмоқда.
Водород сулфид заҳарли газ бўлиб, одамнинг ҳид сезиш нервларини фалаж қилиши мумкин, натижада у модданинг ҳидини сезмай қолади. Бу эса оғир заҳарланишларга олиб келиши мумкин.
«Мустақилликнинг 25 йиллиги» конида газ қазиб олиш лойиҳаси Ўзбекистон ва инвесторлар консорциуми ўртасида 2017 йил 5 апрелда имзоланган маҳсулот тақсимоти тўғрисидаги битимга мувофиқ амалга оширилмоқда. Акциядорлар Altmax Holding (Кипр), «Ўзбекнефтгаз» ва Gas Project Development Central Asia (Россия) компанияларидир. Оператор вазифасини Surhan Gas Chemical Operating Company бажармоқда.
Объект Бойсун шаҳридан 20 километр узоқликда жойлашган бўлиб, Ўзбекистондаги энг йирик ўзлаштирилмаган газ кони ҳисобланади. Унинг захиралари 150 миллиард куб метрдан ортиқ хом газга баҳоланмоқда.
Лойиҳанинг умумий қиймати 5,8 миллиард долларни ташкил этади. Фақат газ-кимё мажмуасига қарийб икки миллиард доллар сармоя киритиш режалаштирилган эди. 2021 йилда Россиянинг VEB.RF ва «Газпром» компаниялари Сурхондарёдаги кон инфратузилмаси учун техника ва хизматлар етказиб бериш учун 900 миллион доллар миқдорида кредит ажратди.
