Фуқаролик ишлари бўйича Учтепа туманлараро судида хонанда Ботир Қодировнинг оталикни белгилаш ҳақидаги даъвоси бўйича ҳал қилув қарори эълон қилинди. Суд уни мамлакат халқ артисти Шерали Жўраевнинг ўғли деб топди.
Аввалроқ ижтимоий тармоқ фойдаланувчилари машҳур Жўраевлар оиласи атрофидаги вазиятни қизғин муҳокама қилган эди. Гап шундаки, ўзбекистонлик ижрочи Ботир Қодиров Зоҳиршоҳ Жўраевга нисбатан оталикни белгилаш иши бўйича судга даъво аризаси киритган.
Шунингдек, Ботир Қодиров ўзини Шерали Жўраевнинг ўғли деб ҳисоблаганлиги сабабли мероснинг ўз қисмини талаб қилаётган ҳужжатларнинг фотосуратлари пайдо бўлди.
«Шерали Жўраев менинг отам. Эсимда, онам билан ажрашгунимизча ҳаммамиз бирга яшаганмиз. Мен ҳеч қачон отамнинг номини қоралашга уринмаганман ва буни хоҳламаганман, шунинг учун 43 йил сукут сақладим. Аммо яқинда Шоҳжаҳон Жўраев мени ва онамни камситган пост эълон қилди. У шундай деб ёзган эди: Сен ҳатто ўз отанг кимлигини ҳам билмайсан, ҳатто ўзингга ҳам ишонмайсан. Шу сўзлардан кейин онамнинг номусини ҳимоя қилишим керак, деган қарорга келдим», — дейди Ботир Қодиров.
Суд Ботир Қодировнинг жавобгарларга (Ўзбекистон халқ артисти Шерали Жўраевнинг ўғилларига) нисбатан оталикни белгилаш тўғрисидаги даъвосини қаноатлантириш тўғрисида қарор қабул қилди.
2023 йил 4 сентябрь куни вафот этган Шерали Жўраевнинг 1981 йил 5 майда туғилган Қодиров Ботир Шералиевичга нисбатан оталик факти аниқланди.
Қарорда Ботир Қодировнинг туғилганлик тўғрисидаги гувоҳномасида «ота» устунида «Шерали Жўраев, 1945 йилда туғилган, миллати ўзбек» ёзуви кўрсатилиши назарда тутилган.
Зоҳиршоҳ Жўраев қароридан норози бўлиб чиқди. Қўшиқчининг маълум қилишича, қарор ноқонуний, у етарли асос ва далилларсиз қабул қилинган, шунинг учун унга нисбатан апелляция шикояти берилади.
