Ўзбекистондаги ягона ўзбек қўғирчоқлари музей-устахонаси ёпилиш хавфи остида қолди. Унинг биносини савдо нуқтасига беришмоқчи. Бу ҳақда «Ўзбекистон қўғирчоқ театри тарихи» кўргазма-музейи директори Зокир Жўраев маълум қилди.
Маълум қилинишича, 2024 йил март ойида музей янги ижара шартномасини имзолаган. Янги шартнома бўйича ижара суммаси аввалги суммадан деярли уч баравар кўп эди.
Кейин аукцион бўлиб ўтди, унда миллий матолардан замонавий аёллар кийимлари ишлаб чиқарувчиси бинога даъвогарлик қилди. Ишлаб чиқарувчи бу жойдан мода намойиши учун фойдаланишни режалаштирмоқда.
«Ўзбекистондаги ягона хусусий қўғирчоқ театри мустақилликнинг дастлабки йилларида Бухорода пайдо бўлди. Унда дунёнинг кўплаб музейлари ва хусусий коллекцияларида сақланаётган сувенир қўғирчоқлар тайёрланган», — дейди музей асосчиси Искандар Ҳакимов.
Музей директори, шунингдек, бу қўғирчоқ театрининг Ўзбекистондаги ягона музей экспозицияси эканлигини таъкидлади. Бу ерда қўғирчоқлар жонланиб, халқимизнинг тарихини ҳикоя қилади, маданиятимиз ва меросимизни акс эттиради, деди музей директори ўз мурожаатида.
Маданият ва санъатни ривожлантириш жамғармаси усталарнинг ёрдам чақириғига муносабат билдирди.
«Ўзбекистон қўғирчоқ театри тарихи» музей экспозицияси ва Бухородаги устахона мамлакатимиз маданий меросининг муҳим қисмидир. Айни пайтда ҳамкасбларимиз бу масала устида иш олиб бормоқда ва у раҳбарият назорати остида. Биз ушбу ноёб объектни қонун ҳужжатларида белгиланган тартибда асраб-авайлашга кўмаклашишга тайёрмиз ва уни ривожлантириш ва оммалаштиришга қаратилган ташаббусларни фаол қўллаб-қувватлаймиз," - дея ишонтиришди жамғармадан.
