Ўзбекистон президенти Шавкат Мирзиёев 2024-2026 йилларда аэрокосмик технологияларни мамлакат иқтисодиётининг турли тармоқларига жорий этишга қаратилган фармонни имзолади. Фармоннинг асосий мақсади - давлат космик мониторингининг самарадорлигини ошириш ва иқтисодиётнинг турли тармоқларидаги долзарб муаммоларни ҳал этишдан иборат.
Давлат космик мониторингининг асосий устуворликлари:
Ер участкаларини ўзбошимчалик билан эгаллаб олиш ва ноқонуний қурилиш ҳолатларини аниқлаш.
Ўрмон массивлари чегараларини белгилаш ва уларнинг ҳолатини назорат қилиш.
Ер қаъридан ноқонуний фойдаланиш ва фойдали қазилмалардан асоссиз фойдаланиш ҳолатларини аниқлаш.
Экологик меъёрларга риоя этилишини назорат қилиш ва чиқиндилар тўпланадиган янги зоналарни аниқлаш.
Қишлоқ хўжалиги ерларидан фойдаланиш самарадорлигини баҳолаш ва экин турларини аниқлаш.
Сув омборларида сув сатҳини назорат қилиш.
2025 йил 1 мартдан бошлаб ер қаърини масофадан мониторинг қилиш ва хавфларни таҳлил қилиш имконини берувчи «Geomonitoring» ахборот тизими ва СГМ платформаси ишга туширилади. Ушбу чора-тадбирлар Ўзбекистон иқтисодиётининг турли тармоқларида ресурсларни назорат қилишни яхшилаш, шаффофлик ва масъулиятни оширишга қаратилган.
Эслатиб ўтамиз, Ўзбекистон президенти Шавкат Мирзиёев жорий йилнинг июнь ойида расмий ташриф билан Туркия пойтахти Анқарага борган эди. 6 июнь куни дастур доирасида у аэрокосмик тизимларни ишлаб чиқарувчи Turkish Aerospace Industries компанияси фаолияти билан танишди.
Аввалроқ, 2023 йил октябрь ойида Ўзбекистонда Корея аэрокосмик университетининг филиали очилиши мумкинлиги маълум бўлган эди, бироқ ҳозирча ушбу ташаббусни амалга ошириш учун ҳеч қандай асос йўқ.
