Ўзбекистон халқаро мудофаа тузилмалари ва ҳарбий альянсларга қўшилиш масаласида нейтрал позицияни эгаллайди, деди Олий Мажлис Қонунчилик палатаси спикерининг биринчи ўринбосари Акмал Саидов.
Саидовнинг таъкидлашича, мамлакат НАТО ёки бошқа ҳарбийлашган бирлашмалар каби ташкилотларга қўшилиш учун ўз суверенитетини чеклаш ниятида эмас.
«Конституциянинг биринчи моддасида Ўзбекистон суверен давлат экани айтилган. Агар гап қандайдир ҳарбийлаштирилган мудофаа тузилмалари ва ташкилотларига аъзо бўлиш ҳақида кетса, йўқ, бунга йўл қўймаймиз.
Ушбу позиция Ўзбекистоннинг Конституцияда мустаҳкамланган ташқи сиёсатининг асосий тамойилларига содиқлигини акс эттиради, унга кўра мамлакат ҳарбий иттифоқлар ва миссиялар масалаларида ўз мустақиллиги ва бетарафлигини сақлаб қолади.
Биз ҳеч қачон ўз йигитларимизни [чет элга] бирон-бир ҳарбий, шу жумладан, тинчликпарвар миссияларни бажаришга юбормаймиз. Бизнинг ҳудудимизда ҳеч қандай хорижий ҳарбий базалар бўлмайди», — деди Саидов.
Евроосиё иқтисодий иттифоқига (ЕОИИ) келсак, Саидов Ўзбекистон ушбу иқтисодий блокка тўлиқ кирмасдан, кузатувчи давлат мақомида қолишга қарор қилганини тушунтирди. Ушбу мақом 2020 йил декабрь ойида ЕОИИга тўлақонли аъзо бўлишнинг афзалликлари ва камчиликлари батафсил таҳлил қилингандан сўнг тақдим этилган.
Бугунги кунда ЕОИИ ҳузуридаги кузатувчи мақомини сақлаб қолиш Ўзбекистон манфаатларига мос келади.
Ўзбекистон Евроосиё мамлакатлари билан иқтисодий интегратсиялашувдан манфаатдор бўлишига қарамай, иқтисодий сиёсат билан боғлиқ қарорларни қабул қилишда мослашувчанлик ва мустақилликни сақлаб қолишни афзал кўради, бу эса суверенитет учун юзага келиши мумкин бўлган хавфларни минималлаштиришга имкон беради.
