Ўзбекистоннинг Гуанчжоудаги Бош консулхонаси вакиллари Хитой халқаро инвестиция ва савдо ярмаркаси (CIFIT) ташкилий қўмитаси директори ўринбосари Чен Сижин билан учрашув ўтказди. Учрашувда 8-9 сентябрь кунлари Сяминда бўлиб ўтган CIFIT 24 ярмаркасида Ўзбекистоннинг иштироки натижалари, шунингдек, келгусидаги ҳамкорлик ва ўзаро манфаатли келишувларни амалга ошириш истиқболлари муҳокама қилинди.
Чен Сижин Ўзбекистон Инвестициялар, саноат ва савдо вазирлиги, Андижон ва Сирдарё вилоятлари делегациялари, шунингдек, Бош консулхона ходимларининг CIFIT тадбирларида иштирок этиши, Ўзбекистон павильонининг ташкил этилиши ҳамда мамлакатнинг инвеститсиявий ва экспорт салоҳияти тақдимоти ҳудудлараро ҳамкорликни мустаҳкамлаш ва инвестицияларни жалб қилишга хизмат қилганини таъкидлади.Унинг сўзларига кўра, кўплаб иштирокчилар Ўзбекистондаги тадбиркорлик ва туризм имкониятлари ҳақида фойдали маълумотларга эга бўлдилар.
Томонлар 2025 ва 2026 йилларда Ўзбекистон вазирликлари ва ҳудудларининг CIFIT ярмаркаларида фаол иштирокини давом эттириш, шунингдек, Ўзбекистон павильони учун қулай шароитлар яратиш ва қўшма тадбирларни ўтказишга кўмаклашишга келишиб олдилар.
