Ўзбекистонда ижтимоий хизматлар ва қўллаб-қувватлаш сифати оширилди, шунингдек, уларни кўрсатиш тизими такомиллаштирилди. «Давлат божи тўғрисида»ги Қонунга парваришга муҳтож ёлғиз кексалар ҳамда ногиронлиги бўлган шахсларни қўллаб-қувватлашга қаратилган ўзгартиришлар киритилди.
Янгиликларга кўра, ёлғиз кексалар ва ногиронлиги бўлган шахслар йўқолган ёки ҳақиқий бўлмаган шахсий гувоҳнома, карта ёки биометрик паспортни алмаштирганда давлат божини тўлашдан озод этилади. Шунингдек, ижтимоий ҳимояга муҳтож фуқароларнинг айрим тоифаларини «Inson» ижтимоий хизмат кўрсатиш марказларида вақтинчалик рўйхатдан ўтказиш учун давлат божи ундирилмайди.
Бундан ташқари, етим болалар ва ота-она қарамоғидан маҳрум бўлган болалар давлат томонидан иккиламчи бозордан сотиб олинган уй-жойни ўз номига расмийлаштиришда давлат божини тўлашдан озод қилиниш ҳуқуқига эга бўладилар.
Шунингдек, ўзгаришлар доирасида парваришга муҳтож ёлғиз кексалар ва ногиронлиги бўлган шахсларни қўллаб-қувватлаш харажатлари солиқ базасини ҳисоблашда ҳисобга олиниши назарда тутилган бўлиб, бу ушбу тоифадаги фуқароларга ёрдам кўрсатиш учун қўшимча рағбатлар яратади.
