Ўзбекистон Фавқулодда вазиятлар вазирлиги аҳоли ва ташкилотлар, корхона ва муассасалар раҳбарларига қиш мавсумида иситиш мосламаларидан фойдаланиш билан боғлиқ эҳтимолий хавф-хатарлар ҳақида огоҳлантириш билан мурожаат эълон қилди.
Мурожаатда таъкидланишича, йилнинг совуқ вақтида электр, газ ва бошқа иситиш қурилмаларидан эҳтиётсизлик билан фойдаланилса, хавфли вазиятлар: ис газидан заҳарланиш, газ-ҳаво аралашмасининг портлаши ва ёнғинлар содир бўлиши мумкин.
Фавқулодда вазиятлар вазирлиги фавқулодда ҳодисаларнинг олдини олиш учун иситиш тизимларини мавсум бошланишидан олдин тайёрлашни қатъий тавсия қилади. Мутахассислар сизга хавфли вазиятлардан қочишга ёрдам берадиган бир нечта муҳим тавсияларни тайёрладилар:
Шикастланган электр симлари ва кабеллардан фойдаланманг.
Ортиқча юкланиш ва қисқа туташувларнинг олдини олиш учун сифатли ҳимоя мосламаларини ўрнатинг.
Иситиш печлари ва дудбуронларни доимий равишда кир-чирлигини текширинг.
Иссиқлик тизимларига хизмат кўрсатиш учун сертификатланган сервис ташкилотларига мурожаат қилинг.
Носоз ёки қўлбола асбоблардан фойдаланманг, шунингдек, ишлаб чиқарувчининг кўрсатмаларига риоя қилинг.
Иситиш печларини ҳаддан ташқари қизиб кетишига йўл қўйманг ва уларни ишлатишни болаларга ишонманг.
Мутахассислар иштирокида газ ускунасини текширинг ва уланиш қоидаларига қатъий риоя қилинг.
Газ сизиб чиққанда дарҳол хонани шамоллатиш ва 104-телефон орқали газ хизматига қўнғироқ қилиш керак. Ёнғин содир бўлган тақдирда эса 101 ёки 1050 телефонлари орқали ёнғин-қутқарув хизматига мурожаат қилинади.
