Фото: Президент матбуот хизмати Ўзбекистон президенти Шавкат Мирзиёев Россиянинг Қозон шаҳрида бўлиб ўтган «БРИКС плюс» форматидаги саммитда нутқ сўзлади.
Давлатимиз раҳбари бугун дунё шиддат билан парчаланиб кетаётгани, уруш ва можаролар кўпайиб, одамларга катта азоб-уқубатлар, чуқур изтироблар ва ўрнини тўлдириб бўлмайдиган талафотлар келтираётганини афсус билан қайд этди.
«Жаҳон иқтисодиёти ва савдосининг парчаланиши тенгсизликни, технологик тафовутни ва протекционизмни кучайтирмоқда. Мамлакатлар ўртасида янги тўсиқлар пайдо бўлмоқда», — деди давлат раҳбари сўзининг аввалида.
Бундай шароитда, деди у, БРИКС тенг ҳуқуқлилик, блокдан ташқарилик, бир-бирининг манфаатларини ҳисобга олиш, суверенитет ва ўз ривожланиш йўлини ҳурмат қилиш каби тамойиллар асосида ҳаракат қилиб, кўп томонлама ҳамкорлик ва шерикликнинг нуфузли ва жадал бирлашмасидир.
«Геосиёсий рақобат, миллий худбинлик ва мафкуравий хурофотлардан холи конструктив мулоқот орқали глобал келишувга эришиш бўйича билдирилган даъватларни қўллаб-қувватлайман», — деди Шавкат Мирзиёев.
Ўзбекистон Президенти Россиянинг БРИКСга раислиги давомида Ўзбекистон БРИКСнинг Ёшлар саммити ва спорт ўйинларида, юридик ва парламент форумларида, хавфсизлик соҳасидаги юқори даражадаги учрашув ва бошқа тадбирларда иштирок этганини эслатди.
Ўзбекистон, шунингдек, БРИКС тадқиқот гуруҳининг сунъий интеллект бўйича қўшма лойиҳаларида иштирок этиш, ЮНИДО ҳузурида ташкил этилаётган БРИКС ваколатлар марказига, шунингдек, таклиф этилган Инвестиция платформасига қўшилиш ниятида.
Президент транспорт боғлиқлигини мустаҳкамлаш, янги трансконтинентал йўлаклар яратиш, ишончли логистика занжирларини шакллантириш, каботаж ташиш тизимини ривожлантириш бўйича БРИКС бўйича шериклар билан яқиндан ишлашга тайёрлигини таъкидлади.
Озиқ-овқат ва энергетика хавфсизлигини таъминлаш, иқлим ўзгаришининг салбий оқибатларини бартараф этиш, соғлиқни сақлаш масалалари бўйича ҳамкорлик муҳим экани таъкидланди.
Бирлашма доирасида ишбилармонлик алоқаларини ривожлантириш ва маданий-гуманитар алоқаларни мустаҳкамлашни қўллаб-қувватлаб, давлат раҳбари барча манфаатдор мамлакатларни БРИКС Ишбилармонлар кенгашига аъзо бўлиш имкониятини кўриб чиқишни таклиф қилди.
Ўзбекистон раҳбари халқаро терроризм таҳдид ва хатарларига қарши курашиш ҳақида сўз юритар экан, экстремизм мафкурасининг радикаллашуви ва тарқалишининг олдини олишда, энг аввало, ёшлар ўртасида кенг халқаро ҳамкорлик қилиш муҳимлигини таъкидлади.
Яқин Шарқда тобора кучайиб бораётган можаро глобал инқирознинг потенциал ўчоғига айланиб бораётгани, унга қўшни давлатлар ва йирик давлатлар ҳам жалб этилаётгани муносабати билан алоҳида хавотир билдирилди.
