Open Doors ҳисоботига кўра, АҚШда таълим олаётган ўзбекистонлик талабалар сони 11,9 фоизга ошиб, 1 минг 219 нафарга етди.
Умуман олганда, 2023/2024 ўқув йилида Америка олий таълим муассасаларида хорижий талабалар сони 1,1 миллиондан ошиб, ўтган йилга нисбатан 7 фоизга ошган.
АҚШнинг Тошкентдаги элчихонаси ҳамда Намангандаги ва Қарши шаҳридаги EducationUSA маслаҳатчилари 18-22 ноябрь кунлари бўлиб ўтадиган Халқаро таълим ҳафталиги доирасида ушбу муваффақиятни фаол нишонламоқда.
Ҳафта давомида АҚШда таҳсил олиш истагида бўлган ўзбекистонлик талабалар учун тадбирлар ташкил этилмоқда. Тошкентда ва American Spaces маконларида жойлашган EducationUSA маслаҳат марказлари ўқишга киришнинг барча босқичларида ресурслар ва ёрдам беради, бу эса ўқишга муваффақиятли кириш имкониятини оширишга ёрдам беради.
Бундан ташқари, элчихона давлат алмашинув дастурлари бўйича ахборот сессияларини ўтказади, унда битирувчилар Америка университетларида ўқиш бўйича ўз тажрибалари билан ўртоқлашадилар.
АҚШнинг Ўзбекистондаги элчиси Жонатан Хеник таълим алмашинуви мамлакатлар ўртасидаги муносабатларни мустаҳкамлашга хизмат қилишини таъкидлади: «Таълим дўстлик ва ўзаро англашув кўприкларини қуришга ёрдам беради. АҚШда ўзбекистонлик талабалар сонининг ўсиши уларнинг билим ва тараққиётга интилишидан далолат беради».
