Жиззах вилояти ИИБ матбуот хизмати хабар қилишича, Бахмал туманида Cobalt русумли автомобиль ҳайдовчиси тезликни ошириб, икки нафар болани ўлдириб қўйган.
Ҳодиса 18 ноябрь куни тахминан соат 19:30 да 4Р-41 «Ғаллаорол-Зомин» йўлининг 29-километрида содир бўлган. Cobalt ҳайдовчиси пиёдалар ўтиш жойида йўлни кесиб ўтаётган икки болани — 2011 йилда туғилган қиз ва унинг 2020 йилда туғилган синглисини уриб юборган, сўнгра ҳодиса жойидан қочиб кетган.
Жабрланганлар олган жароҳатлар туфайли воқеа жойида вафот этишган.
Ушбу ҳолат юзасидан Жиноят кодексининг 266-моддаси 3-қисми «а» банди (одамлар ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) ва 117-моддаси 3-қисми «а» банди (одамлар ўлимига сабаб бўлган хавф остида қолдириш) бўйича жиноят иши қўзғатилган.
Тезкор тадбирлар натижасида гумонланувчи ушланган ва вақтинчалик сақлаш ҳибсхонасига жойлаштирилган.
