17-dekabr kuni E-auksion platformasida Toshkent koʻchalarida pulli toʻxtash joylarini yaratish va boshqarish huquqi uchun takroriy savdolar boʻlib oʻtdi. Auksion 20 daqiqadan sal koʻproq davom etdi va ikki stavkadan soʻng yakunlandi. 62,93 mlrd soʻm taklif qilgan Streetpark Systems kompaniyasi gʻolib boʻldi, bu boshlangʻich narxdan 10 foizga koʻp.
Noyabr oyida boʻlib oʻtgan avvalgi kimoshdi savdosida Balcomuz qoʻshma korxonasi 120 mlrd soʻmga yaqin taklif bilan gʻolib chiqdi, biroq kelishuv tasdiqlanmadi.
Pulli avtoturargohlar tashabbusi oktyabr oyida shahar hokimi Shavkat Umurzoqov tomonidan tasdiqlangandi. Loyiha doirasida 2025-yil avgust oyiga qadar 13,2 mingta avtoturargoh yaratish, kelgusida ularning sonini 84 mingtaga yetkazish rejalashtirilgan. Uch yilga 262,8 ming kvadrat metr koʻcha maydonini boshqarishga oladigan operator loyihaga kamida 5 million dollar sarmoya kiritishi shart.
Tariflar zonaga qarab oʻzgarib turadi: minimal narxi soatiga 5 000 soʻm, maksimal — 12 000 soʻm. Shuningdek, yil yakuniga qadar Toshkent shahar hokimligi avtoturargohlarni boshqarishning avtomatlashtirilgan tizimini ishga tushirishni rejalashtirmoqda.
