Bojxona qoʻmitasi boʻlinmalaridan biri rahbarining oʻrinbosari ham qoʻshilgan holda 17 kishilik guruh noqonuniy diniy tashkilot tuzishda gumon qilinmoqda. Bu haqda Oʻzbekiston Davlat xavfsizlik xizmati (DXX) matbuot xizmati xabar berdi. DXX Ichki ishlar vazirligi bilan hamkorlikda Toshkentda tezkor tadbir oʻtkazgan.
DXXdan olingan maʼlumotlarga koʻra, guruh aʼzolari kechalari milliy taomlar restoranlaridan birida toʻplanishgan. Uchrashuvlar davomida ular diniy adabiyotlarni oʻqishgan, deyiladi xabarda.
Guruh tarkibiga bojxona organlarining uch nafar xodimi, Toshkent davlat sharqshunoslik universiteti talabasi, texnopark direktori oʻrinbosari, xususiy avtomaktab rahbari oʻrinbosari, Sergeli avtomobil bozoridagi avtomobil sotuvchilari va boshqalar kirgan.
Gumonlanuvchilarning yoshi 24 yoshdan 49 yoshgacha boʻlgan. Ularning aksariyati Namangan viloyatida tugʻilib, hozirda poytaxtda istiqomat qilmoqda.
Baʼzi maʼlumotlarga koʻra, Bojxona qoʻmitasi boʻlinmasi rahbari oʻrinbosari “dinga mutaassibona berilgan” va 2021-yildan beri muntazam ravishda norasmiy diniy mashgʻulotlar oʻtkazib kelgan. Har bir mashgʻulot uchun ishtirokchilardan pul yigʻib, ustozlarga berib borgan.
Mashgʻulotlar Telegram orqali Namangan viloyatida tugʻilgan, hozirda Misrda istiqomat qilayotgan 36 yoshli fuqaro tomonidan olib borilgan. Shuningdek, Sharqshunoslik universiteti talabasi ham diniy maʼruzalar oʻqigan.
Bojxona qoʻmitasi boʻlinmasi boshligʻi oʻrinbosari, bojxona xizmati tezkor vakili va katta inspektori, oliy taʼlim muassasasi talabasi va guruhning boshqa aʼzolariga nisbatan Jinoyat kodeksining 216-moddasi - “jamoat birlashmalari yoki diniy tashkilotlarni qonunga xilof ravishda tashkil etish” boʻyicha jinoyat ishi qoʻzgʻatilgan.
Ishga boshqa shaxslar ham gumonlanuvchi sifatida jalb qilingan (ularning aniq soni koʻrsatilmagan).
