Yangi uydan kvartira olyapsizmi? Tekshiruvchilar quruvchilar shartnomalarida nima topdi

Bu yilning toʻqqiz oyida Raqobatni rivojlantirish va isteʼmolchilar huquqlarini himoya qilish qoʻmitasiga qurilish ishlari sifati va uylarni topshirish kechikishi yuzasidan 1 700 ta shikoyat kelib tushdi, deb xabar berdi uning matbuot xizmati. Ushbu murojaatlar boʻyicha isteʼmolchilarga taxminan 14,5 mlrd soʻmlik qayta hisob-kitob qilindi.

Shikoyatlardan soʻng qoʻmita uy-joy qurilishida ulushli ishtirok etish shartnomalarini tahlil qilib, isteʼmolchilar huquqlarini buzadigan 132 ta shartnomani aniqladi. Ularda nimalar topildi:

• 77,3 foizida bekor qilishda pulni qaytarish muddati belgilanmagan yoki birinchi toʻlov shartlariga mos kelmaydi;
• 63,6 foizida koʻchmas mulkni qabul qilishning kafolat muddati yoʻq;
• 59,1 foizida shartlar faqat quruvchi manfaatlarini koʻzlab tuzilgan;
• 54,5 foizida quruvchi kafolat muddatida kamchiliklarni bartaraf etishga majbur emas;
• 33,3 foizida uyni topshirishning aniq muddatlari koʻrsatilmagan;
• 30,3 foizida shartnoma davlat tilida tuzilmagan;
• 49,2 foizida isteʼmolchilar huquqlarini kamsitadigan boshqa shartlar bor.

Quyidagi shartlar ham uchragan: shartnomani xaridor bekor qilsa, toʻlangan summaning 4 foizidan 15 foizigacha ushlab qolish, pulni faqat kvartira qayta sotilgandan keyin qaytarish, uy-joy narxini bir tomonlama oshirish va xaridorlar uchun oshirilgan jarimalar.

Bunday qoidabuzarlikka yoʻl qoʻygan quruvchilar eng koʻpi Toshkentda, 17 ta. Namangan, Navoiy va Toshkent viloyatlarida 15 tadan, Buxoro va Surxondaryoda 13 tadan.

Eslatib oʻtamiz, oʻtgan yilning oktabrida oʻzbekistonliklarga quruvchi bilan shartnomani bekor qilishda jarima noqonuniy ekani eslatilgan edi, hozir esa parlament ulushdorlar pulini eskrou hisobvaraqlari orqali himoya qilishni muhokama qilmoqda.