Ўзбекистондаги Урганч халқаро аэропорти 2024 йил 5 август куни Тошкент вақти билан соат 11:00 да йўловчилар учун ўз эшикларини очади. Таъмирлаш-қурилиш ишлари муддатидан аввал якунланди. Аввалроқ очилиш 7 август кунига белгиланганди.
Жорий йилнинг 20 июль куни Урганч халқаро аэропорти учиш-қўниш йўлагини капитал таъмирлаш ишлари бошланиши муносабати билан ўз фаолиятини тўхтатди. Барча рейслар Нукус халқаро аэропортига йўналтирилди, йўловчиларга Нукус ва Урганч аэропортлари ўртасида трансферлар тақдим этилди.
Икки ҳафта ичида бутун узунлиги 3000 метр ва эни 45 метр бўлган учиш-қўниш йўлаги қопламасини алмаштириш ва мустаҳкамлаш ишлари якунланди. Бундан ташқари, иккинчи ва учинчи такси йўллари капитал таъмирдан чиқарилди. Бу аэропортга Boeing 787 ва Airbus А330 каби кенг фюзеляжли самолётларни чекловларсиз қабул қилиш имконини беради. Бунинг ҳисобидан Урганч шаҳрига рейслар сони ва йўловчилар оқими кўпаяди.
Урганч шаҳридаги учиш-қўниш йўлаги охирги марта 1997 йилда капитал таъмирланган. 2018 йилда чизиқнинг шикастланган қисмларини қисман таъмирлаш ишлари олиб борилди.
