Қирғизистон президенти Садир Жапаров ўзбекистонлик бокс мураббийи Акмал Ҳасанов билан учрашди ва унга Париж Олимпиадасида қирғизистонлик спортчига кўрсатган ёрдами учун миннатдорчилик рамзи сифатида автомобиль совға қилди.
Садир Жапаров мураббий билан суҳбатда Олимпия ўйинларининг кумуш медали совриндори Мунарбек Сейитбек ўғлининг қўллаб-қувватлашга муҳтож бўлган пайтдаги қаҳрамонона ҳаракатини алоҳида таъкидлади.
«Дунё Марказий Осиё халқларининг ҳамжиҳатлиги, дўстлиги, ўзаро меҳр-муҳаббатига гувоҳ бўлди. Спорт тинчлик элчиси деб аталади. Бундай қадам билан ўзаро уйғунликни мустаҳкамлашга ўз ҳиссангизни қўшасиз. Бундан буён ҳам дўстлигингиз мустаҳкам бўлсин», — деди Қирғизистон президенти.
Акмал Ҳасанов, ўз навбатида, илиқ сўзлар учун миннатдорлик билдириб, Мунарбек Сайитбек ўғли билан йиғинларда кўп марта учрашганини ва ўйламасдан Париж Олимпиадасида унинг секунданти бўлишга рози бўлганини таъкидлади. Шунингдек, у Жапаров ва барча қирғизистонликларни муносиб ғалаба билан табриклади.
Эслатиб ўтамиз, қирғизистонлик боксчининг шахсий мураббийи аккредитация ва виза олиш билан боғлиқ муаммолар туфайли ўйинларга чиқа олмади.
Ўзбекистонлик мураббийнинг қўллаб-қувватлаши туфайли қирғизистонлик боксчи финалга чиқди ва мамлакат бокс тарихидаги биринчи Олимпиада кумуш медалини қўлга киритди.
Автомобилдан ташқари, Қирғизистон Акмал Ҳасановни буюк ёзувчи Чингиз Айтматов медали билан тақдирлади ва ёрдам учун миннатдорчилик билдирди.
«Олимпиадага бир ўзи келгани учун Мунарбек биз билан машғулот ўтказди. У мендан ёрдам беришни сўради. Қўшни давлатларимиз ўртасида дўстона муносабатлар бўлгани учун биз унга мамнуният билан ёрдам бердик. У тарихга кирди ва Қирғизистон тарихида бокс бўйича биринчи Олимпия совриндори бўлди», — деди Акмал Ҳасанов.
