Ўзбекистонда «махфий» давлат харидларини амалга ошириш ҳолатлари кўпайди, деб ёзади «Ревизор» Теlegram-канали муаллифи. Бу, айниқса, чакана ва улгуржи савдо, автомобилларни таъмирлаш каби соҳаларда ушбу харидлар ортида қандай сирлар яширинган бўлиши мумкинлиги ҳақидаги саволларни келтириб чиқаради.
Бундай «махфий» давлат харидларига «Боғишамол йўллардан мунтазам фойдаланиш» бошқарув компанияси билан «Diyora» компанияси ўртасида тузилган 43,5 миллион сўмлик шартнома мисол бўла олади. Бироқ, ушбу шартнома билан танишиш ва уни муҳокама қилиш мумкин эмас, чунки у «давлат сири бўлган ва махфий хусусиятга эга бўлган харидлар» тоифасига киради.
Гумонли давлат харидларини фош этиш билан шуғулланувчи «Ревизор» Telegram канали муаллифи «махфий» гриф бевосита шартномаларда босилишига эътибор қаратади. Бу эса амалга оширилаётган харидларнинг шаффофлиги ва ҳалоллигига нисбатан хавотир уйғотмоқда.
«Давлат буюртмачиларининг харидлари тўғридан-тўғри шартнома тузиш йўли билан амалга оширилиб, жамоатчиликка ошкор қилинмай, яширин тарзда амалга оширилаётган "махфий" давлат харидлари ҳолатлари кузатилди. Бу эса коррупцияга йўл очиши мумкин,— дейди муаллиф.
«Взгляд.uz» Коррупцияга қарши курашиш агентлигига изоҳ сўраб мурожаат қилди. Идора ушбу масалани ўрганиш бошланганини маълум қилди.
Шунингдек, таҳририят Рақобатни ривожлантириш қўмитасига мурожаат қилди, бироқ у ерда Иқтисодиёт ва молия вазирлиги ваколатли орган эканлигини таъкидлаб, бу ҳолатга изоҳ бермасликларини айтишди. Иқтисодиёт ва молия вазирлигининг ўзи ҳозирча сукутда.
