Raqobatni rivojlantirish va isteʼmolchilar huquqlarini himoya qilish qoʻmitasi 2024-yilda mamlakat hududlarida tashqi reklama monitoringini oʻtkazdi. Oʻrganish natijalariga koʻra, joylashtirish qoidalari, davlat tili meʼyorlariga rioya qilish va imlo xatolarining yoʻqligi boʻyicha koʻplab qoidabuzarliklar aniqlandi.
Xorazm viloyati
Tekshirilgan 3,5 mingta reklama konstruksiyasidan 1,8 mingtasi belgilangan talablarga javob bermagan. Aniqlangan barcha kamchiliklar bartaraf etildi. Reklama qonunchiligiga rioya qilmagani uchun “Hvara,” “Urganch Maftun Avia Trevel” va “Xorazm Elite Tour” kabi 5 ta kompaniyaga nisbatan ish qoʻzgʻatilgan.
Qashqadaryo viloyati
4 mingta reklama va targʻibot konstruksiyalari tekshirilganda 13 ta korxonada qonunbuzilish holatlari aniqlangan. Toʻqqizta holatda ularni bartaraf etish va kelgusida bunday holatlarning oldini olish boʻyicha koʻrsatmalar berildi.
Toshkent
Tekshirilgan 3,4 mingta reklama konstruksiyasidan 1,4 mingtasida qoidabuzarlik aniqlangan. Oʻrganish natijalariga koʻra, 295 ta tashkilotga rasmiy ogohlantirish berildi, 520 ta holat tushuntirish ishlari orqali bartaraf etildi. Rahmat Travel Group, Comfort Travel And Ziyarah kabi 15 ta kompaniyaga nisbatan ish qoʻzgʻatilib, koʻrsatma berilgan.
Andijon viloyati
Ziyorat bilan bogʻliq turistik xizmatlar reklamasiga alohida eʼtibor qaratildi. Qoidabuzarliklar 11 ta kompaniyada, jumladan, Ihlos Travel 1, Salaam va Zaytun Travelʼda aniqlangan. 3 ta korxonaga nisbatan tumanlararo iqtisodiy sudga daʼvo arizalari kiritilgan boʻlib, sud jarayonlari davom etmoqda.
Eslatib oʻtamiz, avvalroq Raqobat qoʻmitasi Umra xizmatlarini tegishli litsenziyasiz reklama qilgan 15 ta sayyohlik kompaniyasini jarimaga tortgandi.
