Raqobat qoʻmitasi Umra xizmatlarini tegishli litsenziyasiz reklama qilgani uchun 15 ta sayyohlik kompaniyasiga jarima soldi.
Idoraning Andijon, Namangan, Samarqand va Xorazm viloyatlaridagi boshqarmalari tomonidan 10 ta - Al-Azhar Travel, Atlas Avia Tour, Diyor Tour, Hiro Travel, Maknoon Travel, Marmara Travel Namangan, Meroj Travel, Profi-Travel, Sultan Travel 2022 va Ideal Travel kompaniyalari tomonidan qoidabuzarliklar aniqlangan. Ularga nisbatan moliyaviy jarimalar qoʻllanildi.
Namangan va Fargʻona viloyatlarida yana 5 nafar turoperator maʼmuriy javobgarlikka tortildi. Qoidabuzarliklar Fargona Tour 2022, Safo Marva, Umra Ziyorati Agentligi, Ziyoratul Umra va Buvaydaliklar Hayoti Telegram-kanalida aniqlangan.
Litsenziyasiz reklama tarqatayotgan 10 dan ortiq axborot resurslari haqidagi maʼlumotlarga aniqlik kiritish maqsadida IIV Kiberxavfsizlik markaziga murojaat yuborildi. Tekshiruv yakunlari boʻyicha “tegishli choralar” koʻriladi.
Eslatib oʻtamiz, umra oʻtkazish huquqiga ega kompaniyalar roʻyxatiga Toshkent shahridan 6 ta, Namangandan 3 ta, Andijon, Margʻilon va Urganchdan bittadan firma kiritilgan.
