Oʻzbekistonda avvalgi Olimpiya va Paralimpiya oʻyinlari natijalariga koʻra sport turlarini uch toifaga ajratib, sportchilarni tayyorlash tizimini isloh qilish rejalashtirilgan. Bu haqda prezident matbuot kotibi Sherzod Asadov xabar berdi.
Oʻzbekistonda yunon-rum kurashi, ayollar kurashi, kamondan otish va qilichbozlikni rivojlantirish uchun yetarli resurslar va iqtidorli sportchilar mavjud. Boʻlajak Olimpiya va Paralimpiya oʻyinlarida yuqori natijalarga erishish uchun xorijlik mutaxassislarni jalb etib, sportchilarning jismoniy va ruhiy tayyorgarligini kuchaytirish rejalashtirilgan.
Bundan tashqari, yengil atletika, velosport, eshkak eshish, suzish, oʻq otish kabi 22 ta istiqbolli yoʻnalish boʻyicha litsenziyalarni koʻpaytirish vazifasi qoʻyildi. Sinxron suzish, triatlon, voleybol, basketbol, gandbol, badminton kabi 17 ta yangi sport turi boʻyicha ham litsenziya olish ishlarini jadallashtirish zarur.
Shuningdek, sport tashkilotlari rahbarlari hududlardagi tayanch maktablarni tanlab, iqtidorli yoshlarni aniqlash, ularning infratuzilmasini yaxshilash va malakali murabbiylar bilan taʼminlashni boshlaydi. Ushbu chora-tadbirlar oʻzbekistonlik sportchilarning jahon maydonidagi raqobatbardoshligini oshirishga qaratilgan.
Avvalroq Oʻzbekistonda istiqbolli sportchilarni izlash, saralash va tayyorlash boʻyicha innovatsion platforma yaratilishi haqida xabar berilgandi. Yangi raqamli platforma iqtidorli sportchilarni maktabdayoq aniqlashga va ularning rivojlanishini karyerasining barcha bosqichlarida kuzatib borishga yordam beradi.
