Xalqaro qidiruvga berilgan Qozogʻistonning Aqtau shahri hokimining sobiq oʻrinbosari Timur Saidvaqosov Oʻzbekistonda qoʻlga olindi.
Endi Saidvaqosov 5 yildan 10 yilgacha ozodlikdan mahrum etilishi mumkin — Oʻzbekistonda davlat chegarasini noqonuniy kesib oʻtish maqsadida bir guruh shaxslar bilan oldindan til biriktirganlik uchun shunday jazo koʻzda tutilgan.
Hokim oʻrinbosari Shimoliy Qozogʻiston viloyatida “Обуховское” nodir metallar konini oʻzlashtirayotgan “Тиолайн” kompaniyasi faoliyati bilan bogʻliq korrupsiya jinoyatlarida gumon qilinmoqda. Tergov versiyasiga koʻra, korxona aksiyadorlaridan biri — Viktor Dolgalev oʻz biznesida qonunbuzarliklarga yoʻl qoʻygan, jumladan, noqonuniy tadbirkorlik bilan shugʻullangan va yer qaʼridan oʻzboshimchalik bilan foydalangan.
Avvalroq sud Dolgalyovni oqlagan, biroq koʻp oʻtmay hukm bekor qilinib, ish boshqa viloyatga qayta koʻrib chiqish uchun yuborilgandi. Tergov versiyasiga koʻra, tadbirkor oʻz muammolarini amaldorlar, jumladan, Saidvaqosov yordamida hal qilgan. Hokim oʻrinbosari firibgarlik va pora berishga undashda ayblanmoqda.
Uning gumonlanuvchilar safiga qoʻshilganidan xabar topgan hokim oʻrinbosari yashirinishga uringan.
