Markaziy bank 2027 yil davomida qatʼiy pul siyosatini saqlashni rejalashtirmoqda: yumshatish — inflyatsiya 5 foiz atrofida mustahkamlangach

Markaziy bank boshqaruvi 4-noyabr kuni 2027 yil va 2028–2029 yillar davriga pul-kredit siyosatining asosiy yoʻnalishlari loyihasini maʼqulladi. Hujjat jamoatchilik muhokamasi uchun ochiq.

2026–2027 yillarda siyosat qatʼiy boʻlib qoladi. MB kutishicha, 2027 yilda pul bozorining UZONIA real stavkasi 6–7 foizni tashkil etadi: bu talabni jilovlashi va soʻmdagi jamgʻarmalarni qoʻllab-quvvatlashi kerak. Regulyator neytral sharoitlarga faqat inflyatsiya maqsad atrofida barqaror mustahkamlangach oʻtishga tayyor. Xavflar kuchaysa, qatʼiy sharoitlar uzaytiriladi.

Bazaviy ssenariyga koʻra, umumiy inflyatsiya 2027 yilning ikkinchi yarmida 5 foizgacha pasayadi va 2028–2029 yillarda shu daraja atrofida qoladi. Bazaviy inflyatsiya 2027 yilda 4–5 foizga tushadi.

YaIM oʻsishi 2027 yilda 7–7,5 foiz, 2028–2029 yillarda 6,5–7,5 foiz boʻlishi kutilmoqda. Ssenariy geosiyosiy mojarolarning soʻnishi, neft narxining pasayishi, byudjet taqchilligi YaIMning qariyb 3 foizi va tartibga solinadigan narxlar islohoti yakunlanishiga asoslanadi. Oʻzbekistonning JSTga kirishi ehtimoli ham hisobga olingan.

Xavflar orasida MB savdo hamkorlari valyutalarining kuchli qadrsizlanishi, neft va oziq-ovqatning jahon narxlari keskin oshishi va banklar raqobati tufayli kreditlashning tezlashishini aytib oʻtdi. Bunday holatda siyosat tezkor qayta koʻrib chiqiladi.

Hujjatda yangi vositalar, jumladan islomiy moliyalashtirish, derivativlar bozori va xedjlashni rivojlantirish ham koʻzda tutilgan.

Eslatib oʻtamiz, oʻsha kuni Markaziy bank asosiy stavkani 14 foiz darajasida saqlab qoldi.