Oʻzbekiston shaharlarida velosiped ijarasini ishga tushirmoqchi: qachon va qayerda paydo boʻladi

2030 yilgacha yoʻlovchi transportini kompleks rivojlantirish strategiyasi loyihasida 2027 yil 1 sentabrdan poytaxt, Nukus va barcha viloyat markazlarida velosiped ijarasi punktlarini bosqichma-bosqich yaratish nazarda tutilgan.

Ular odamlarga bekat va stansiyalardan yoʻnalishning soʻnggi nuqtasigacha yetib olishga yordam berishi kerak: metro, poyezd yoki avtobusdan tushib, ishga, uyga yoki oʻqishga velosipedda borish mumkin boʻladi. Hujjatda avtobuslardagi yuklamani kamaytirish, CO₂ chiqindilarini pasaytirish va mashina hamda taksidagi qisqa safarlar sonini qisqartirish koʻzda tutilgan.

Toshkentda jamoat transportidan bir kunda 1,4 mln dan ortiq odam foydalanadi, yoʻllardagi mashinalar esa asosiy magistrallar moʻljallanganidan qariyb ikki baravar koʻp.

Bu qanday ishlashi kerak:

• Qoraqalpogʻiston Vazirlar Kengashi, viloyatlar va Toshkent hokimliklari yoʻlovchi oqimlarini oʻrganib, stansiyalar joyini tasdiqlaydi;
• punktlar transport tugunlari, metro stansiyalari, vokzallar, avtostansiyalar, talabalar shaharchalari va bogʻlar yonida joylashtiriladi;
• loyihani tadbirkorlar va xususiy investorlar moliyalashtirishi rejalashtirilgan, davlat esa yer ajratadi va punktlarni umumiy transport tarmogʻiga qoʻshadi.

Keyinroq boʻsh velosipedlar haqidagi maʼlumotlarni yagona «Bir yoʻl» raqamli platformasi va navigatsiya ilovalari bilan bogʻlash, «metro va velosiped» kabi yoʻnalishni smartfonda tuzish imkonini berish moʻljallanmoqda.

Bunda velosiped yoʻlaklari va turargohlarini yaratish hujjatda nazarda tutilmagan.

Eslatib oʻtamiz, martda Toshkentdan Nurafshonga tezyurar avtobuslar qatnovi yoʻlga qoʻyilishi xabar qilingan edi.