Рақобатни ривожлантириш ва истеъмолчилар ҳуқуқларини ҳимоя қилиш қўмитаси истеъмолчиларга кредит шартлари ҳақида нотўғри маълумот бергани учун «Invest Finans Bank»ка жарима солди, деб хабар қилди қўмита матбуот хизмати.
Банк Тошкентнинг турли туманларидаги LED экранларда «50 000 000 сўм кафилсиз, 50 кун фоизсиз, 5 йилга дам олиш, таъмирлаш, асбоб-ускуналар учун» матни билан реклама жойлаштирди.
Бироқ банкнинг расмий веб-сайтини ўрганиш натижаларига кўра, бундай шартлар фақат Инфин блаcк кредит картасига татбиқ этилиши маълум бўлди, унга кўра йиллик 23,99 фоиз ставкаси билан 60 ойгача бўлган муддатга 50 миллион сўмгача бўлган сумма мавжуд.
Қўшимча равишда нақд пул ечиб олиш учун комиссия 2%, картадан картага ўтказиш учун — 1%, фоиз ставкаси эса йиллик 25,55% дан 54,75% гача ўзгариб туради. Бу шартлар ташқи рекламада кўрсатилмаган.
«Реклама тўғрисида»ги ва «Истеъмолчиларнинг ҳуқуқларини ҳимоя қилиш тўғрисида»ги қонунлар бузилганлиги сабабли қўмита томонидан иш қўзғатилиб, банкка жарима солинди ҳамда аниқланган қоидабузарликларни бартараф этиш ва келгусида уларнинг такрорланишининг олдини олиш бўйича кўрсатма берилди.
