Oʻzbekistonda birja savdolariga qoʻyiladigan avtomobil benzinining kunlik hajmi vaqtincha ikki barobarga oshiriladi. Bu haqda Energetika vazirligi maʼlum qildi.
Sovuq havo oqimi tufayli ayrim hududlarda gaz quyish shoxobchalari faoliyatiga qisqa muddatli cheklovlar joriy etilganligi sababli tegishli qaror qabul qilindi.
Avtomobil benzini hajmining koʻpaytirilishini taʼminlash uchun barcha hududlarda zarur zaxiralar yaratildi. Vazirlik, shuningdek, zarurat tugʻilganda, talab va taklifdan kelib chiqib, birja savdolariga qoʻyiladigan avtobenzin hajmini yanada oshirish imkoniyati mavjudligini taʼkidladi.
Isteʼmolchilarning avtobenzinga boʻlgan ehtiyojini toʻliq qondirish masalasi davlat nazoratida turibdi.
Vazirlik, shuningdek, xususiy yoqilgʻi quyish shoxobchalari egalarini narxlarni oshirmaslikka va avtobenzinni sifat hamda miqdor meʼyorlariga muvofiq sotishga chaqirmoqda.
