Ijtimoiy tarmoqlarda yo‘lovchilar to‘planishi va “Texnopark” va “Qipchoq” bekatlari o‘rtasidagi tartibsiz metro harakatidan shikoyat qilina boshlandi. Toshkent shahar transport bosh boshqarmasi holat yuzasidan izoh berdi.
Ushbu yo‘nalishda 32 ta avtobus: 7 ta King Long, 16 ta Yutong elektrobuslari va 6 ta Yutong gazda harakatlanuvchi avtobuslari har kuni 390 dan ortiq qatnovlarni amalga oshirmoqda. Belgilangan harakat oralig‘i 3-5 daqiqani tashkil etadi.
Asosiy yuklama “Texnopark” stansiyasida qayd etiladi. Yo‘lovchilar oqimini to‘liq qamrab olish va harakat intervalini tartibga solish maqsadida mas’ul xizmatlar tomonidan nazorat kuchaytirildi.
Tig‘iz soatlarda harakat oralig‘i 3-5 daqiqadan oshadi. Bu avvalo yo‘llardagi tirbandlik bilan bog‘liq. Shu munosabat bilan Toshkent shahar YHXB va shahar xizmatlari jamoat transportining ustuvor harakatini ta’minlashga jalb etildi.
Har kuni tezkor guruhlar ishlamoqda, ular joyida vaziyatni o‘rganib, harakat jadvaliga o‘zgartirishlar kiritmoqda. Boshqarma vaqtinchalik noqulayliklar uchun uzr so‘radi va yo‘lovchilardan tushunishlarini so‘radi.
Yuklamani kamaytirish choralari kompleks ravishda amalga oshirilmoqda, yer usti metro yo‘nalishi qayta tiklanganidan so‘ng vaziyat barqarorlashadi, — deyiladi xabarda.
