Issiq tugadi: hafta davomida Oʻzbekistonda momaqaldiroqli yomgʻirlar, shimolda esa tungi sovuqlar kutilmoqda

Oʻzgidromet ish haftasi uchun ob-havo prognozini eʼlon qildi. Dam olish kunlari kunduzi 25–28° iliq, janubda va choʻl hududida 30–32° gacha boʻldi, Buxoro, Navoiy va Toshkentda harorat rekordlari yangilandi. Dushanbadan boshlab ob-havoni sovuq va nam havo massasining kirib kelishi oʻzgartirmoqda.

Mamlakat boʻylab nima kutilmoqda:

• 9-noyabr: ayrim joylarda yomgʻir, baʼzi hududlarda kuchli, momaqaldiroq boʻlishi mumkin, faqat Fargʻona vodiysida yogʻingarchilik kutilmaydi. Shamol 13–18 m/s gacha, ayrim joylarda chang koʻtariladi. Kunduzi 15–20° iliq, shimolda 8–13°;
• 10-noyabr: butun mamlakat boʻylab yomgʻir, ayrim joylarda kuchli, momaqaldiroq bilan, Qoraqalpogʻistonda qor yogʻishi mumkin. Tunda 7–12° iliq, kunduzi 10–15°, shimolda tunda 0–5°, kunduzi 5–10°;
• 11-noyabr: mamlakatning katta qismida yomgʻir, Qoraqalpogʻiston, Xorazm, Buxoro va Navoiy viloyatlarida yogʻingarchilik kutilmaydi. Tunda 3–8° iliq, kunduzi 7–12°, shimolda tunda 2–7° sovuq, kunduzi 3–8° iliq;
• 12-noyabr: yogʻingarchilik kutilmaydi. Tunda 0–5° iliq, ayrim joylarda 2° gacha sovuq, kunduzi 7–12° iliq, shimolda tunda 2–7° sovuq, kunduzi 3–8° iliq;
• 13-noyabr: ayrim joylarda yomgʻir. Tunda 0–5° iliq, ayrim joylarda 2° gacha sovuq, kunduzi 7–12° iliq, shimolda tunda 2–7° sovuq, kunduzi 5–10° iliq.

Toshkentda:

• 9-noyabr: vaqti-vaqti bilan yomgʻir, momaqaldiroq boʻlishi mumkin, shamol 11–13 m/s gacha kuchayadi, 18–20° iliq;
• 10-noyabr: yomgʻir, momaqaldiroq boʻlishi mumkin, tunda va kunduzi 12–14° iliq;
• 11-noyabr: vaqti-vaqti bilan yomgʻir, tunda 5–7° iliq, kunduzi 8–10°;
• 12-noyabr: yogʻingarchilik kutilmaydi, tunda 1–3° iliq, kunduzi 10–12°.

Eslatib oʻtamiz, bugun Oʻzgidromet Buxoro, Navoiy va Toshkentda koʻp yillik issiqlik rekordlari yangilangani haqida xabar bergan edi.