Fargʻonada bolalar zaharlanishiga sabab boʻlgan yetkazib beruvchi rahbari baribir qamoqqa yuborildi

Ishni Fargʻona viloyat sudi jinoyat ishlari boʻyicha sudlov hayʼatining kassatsiya instansiyasi koʻrib chiqdi, deb xabar berdi viloyat sudlari matbuot xizmati.

Sud 7-noyabr kuni Furqat tuman sudining 21-sentabrdagi hukmini Garden Catering Trade kompaniyasi rahbari va uning texnologiga oid qismida bekor qilib, ularga nisbatan yangi ayblov hukmi chiqardi. Jinoyat kodeksining bir nechta jinoyat uchun jazo tayinlash toʻgʻrisidagi 59 va 61-moddalari tartibida rahbarga 4 yil, texnologga 3 yil 6 oy ozodlikdan mahrum qilish jazosi tayinlandi.

Sentabrda ayblanuvchilar sanitariya qonunchiligini buzish, oʻzlashtirish yoki rastrata yoʻli bilan talon-toroj qilish, oʻgʻrilik va hujjatlarni qalbakilashtirishda aybdor deb topilgan edi. Bu moddalar mol-mulkni musodara qilgan holda 8 yilgacha ozodlikdan mahrum qilishni nazarda tutadi. Biroq oʻshanda ayblanuvchilar zararni qoplagani uchun sud zalidan ozod qilingan: rahbarga 3 yil 6 oy, texnologga 3 yil ozodlikni cheklash, direktor va buxgalterga 3 yildan axloq tuzatish ishlari tayinlangan edi.

Zaharlanish fevral oyida sodir boʻlgan. 20-fevral kuni Fargʻonadagi davlat bolalar bogʻchalariga sifatsiz goʻshtli doʻlma yetkazib berilgan, ertasi kuni esa 105 nafar tarbiyalanuvchi oʻtkir diareya va zaharlanish belgilari bilan kasalxonaga yotqizilgan.

Tergov doʻlmada salmonella va stafilokokk borligini aniqladi. Korxona oshxonasidan olingan 316 ta surtmaning 80 tasida ichak tayoqchasi, yana 10 tasida tilla rang stafilokokk topilgan. Omborlarda buzilgan un, tuz va bodringlar saqlangan.

Avvalroq Toshkent viloyatida bolalarning ommaviy zaharlanishi haqida xabar berilgan edi, shundan soʻng yuzdan ortiq tarbiyalanuvchi shifokorlar nazoratiga olingan.