Sunʼiy intellekt Oʻzbekistonda jinoyatchilik qayerda oshishini oldindan aytib beradi

Bu Shavkat Mirziyoyev 6-noyabr kuni imzolagan farmonda nazarda tutilgan. Hujjat Qonunchilik maʼlumotlari milliy bazasida eʼlon qilindi.

Hozir huquq-tartibot idoralari asosan sodir etilgan jinoyatlarni hisobga oladi. Yangi tizim esa oldindan ishlashi kerak: vaziyat qanday oʻzgarishini prognozlash va huquqbuzarliklarga olib keladigan omillarni oʻz vaqtida bartaraf etish.

Sunʼiy intellekt modellari hududlar va mahallalardagi xavflarni baholaydi. Buning uchun ular statistika, ijtimoiy-iqtisodiy va demografik koʻrsatkichlar, infratuzilma haqidagi maʼlumotlar hamda aholi soʻrovlari natijalarini oʻrganadi.

Yana nimalar nazarda tutilgan:

• platforma turli idoralar bazalari, 112 xizmati, jinoyat-huquqiy statistikaning elektron tizimlari va davlat xizmatlari portalidan maʼlumotlarni avtomatik ravishda toʻplaydi;
• xavfsizlikning haqiqiy darajasi, yashirin jinoyatchilik koʻlami va profilaktika qanchalik yaxshi ishlayotganini koʻrsatadigan umumlashgan koʻrsatkich paydo boʻladi;
• prognozga koʻra vaziyat murakkablashayotgan hududlar zudlik bilan choralar koʻrish va u yerga resurslar yoʻnaltirish zarurligi haqida avtomatik bildirishnoma oladi.

Farmonda algoritmlar ishlaganda shaxsga doir maʼlumotlar qatʼiy himoya qilinishi, axborot xavfsizligi va maxfiylik talablariga rioya etilishi alohida belgilab qoʻyilgan. Hukumat bunday yondashuv jinoyatchilikni kamaytirish va odamlarning huquq-tartibot idoralariga ishonchini oshirishga yordam berishini kutmoqda.

Eslatib oʻtamiz, oʻtgan hafta Mirziyoyev mintaqa yetakchilariga sunʼiy intellekt xavfsizlikka qanday tahdid solayotganini soʻzlab bergan edi. Avvalroq Oʻzbekistonda milliy sunʼiy intellekt ishlab chiqilishi xabar qilingan edi.