Давлат хавфсизлик хизмати ва Бош прокуратура ҳузуридаги Иқтисодий жиноятларга қарши курашиш департаменти томонидан қалбаки пул муомаласи билан боғлиқ бир қанча ҳолатларга чек қўйилди, деб хабар қилди ДХХ матбуот хизмати.
Жумладан, Тошкент вилоятининг Оҳангарон туманида Фарғона вилоятида яшовчи, муқаддам одам савдоси билан боғлиқ жинояти учун судланиб, ҳозирда пробация назоратида бўлган шахс қўлга олинди.
Эркак сохта 20 минг долларни 14 минг ҳақиқий долларга сотишни режалаштирган. У 12 минг қалбаки долларни бераётган вақтида ушланган. Шунингдек, қўлга олинган шахснинг уйидан 400 дона қалбаки доллар олиб қўйилди.
Бундан ташқари, унинг шериги, муқаддам судланган Фарғона вилоятида яшовчи 24 ёшли фуқаро қўлга олиниб, унинг машинасидан 10,5 минг қалбаки доллар топилган.
Тошкент шаҳрида қалбаки 18,8 минг АҚШ доллари эвазига 141 миллион сўм олиш ниятида икки нафар гумонланувчи қўлга олинди. Улардан қўшимча 9,5 минг доллар пул ҳам олиб қўйилди.
Яна бир ҳолатда Андижон вилоятининг икки нафар фуқароси қўлга олинди. Улар 100 долларлик қалбаки пулларни 40 долларга сотишни режалаштирган. Улар 20 минг сохта пул эвазига 8 минг реал доллар олаётган вақтда қўлга олинди.
Мазкур ҳолатлар юзасидан қўлга олинганларга нисбатан жиноят иши қўзғатилган.
