Футбол бўйича Ўзбекистон терма жамоаси 2026 йилги жаҳон чемпионати саралашининг учинчи босқичида Доҳада Қатарга 2:3 ҳисобида енгилди.
Қатар терма жамоаси ҳужумчиси Али Алмоэз биринчи бўлимда иккита гол урди. Ўзбекистон иккинчи бўлимда ўйинни тенглаштирди: Аббосбек Файзуллаев дубл қайд этди. Лукас Мендес ўйиннинг сўнгги қўшимча дақиқасида жамоасини ғалабага олиб чиқди.
Таъкидлаш жоизки, учрашувнинг 24-дақиқасида Ўзбекистон терма жамоаси сардори Элдор Шомуродов жароҳатланиб, майдонни тарк этди. «Рома» ҳужумчиси ўрнига Жалолиддин Машарипов тушди.
Гуруҳнинг параллель ўйинида Қирғизистон БАА жамоасига 0:3 ҳисобида мағлуб бўлди. Эрон КХДР устидан 3:2 ҳисобида ғалаба қозонди.
Беш турдан сўнг Ўзбекистон терма жамоаси 10 очко тўплаб, А гуруҳида иккинчи ўринни эгаллаб турибди. Қатар 7 очко билан тўртинчи ўринда, БАА терма жамоаси ҳам шунча очкога эга. 13 очко тўплаган Эрон футболчилари пешқадамлик қилмоқда
