“Tolibon” tashqi ishlar vaziri oʻrinbosari Abbos Stanikzay harakat rahbari Xaybatulla Oxundzoda buyrugʻi bilan hibsga olinishdan qochish uchun Afgʻonistonni tark etgani haqidagi xabarlarni rad etmoqda. Stanikzayning aytishicha, u sogʻligʻi tufayli dam olishga ketgan va Oxundzoda bilan hech qanday kelishmovchiligi yoʻq, deb xabar bermoqda bir qator ommaviy axborot vositalari.
Dushanba kuni Stanikzay COVID-19 ga oʻxshash kasallikka chalinganini va bu uni tibbiy yordamga murojaat qilishga majbur etganini maʼlum qildi. U mamlakatdan qochgani haqidagi ayblovlarni rad etdi va ommaviy axborot vositalarini Dubayga borgani haqida “yolgʻon axborot” tarqatishda aybladi. Shu bilan birga, u oʻz safarini mudofaa vaziri Mulla Yaqub Mujohid yordamida uyushtirgani haqidagi daʼvolarga izoh bermadi.
Ishonchli manbalarga koʻra, Haybatulla Oxundzoda “Tolibon”ning ayollar huquqlari boʻyicha siyosatini tanqid qilgani uchun Stanikzayni hibsga olish va mamlakatdan chiqishini taqiqlash haqida koʻrsatma bergan. Xususan, Stanikzay qizlarning taʼlim olishini taqiqlash va boshqa cheklovlarni adolatsiz va islomga zid deb atab, ular shariatni emas, Oxundzodaning shaxsiy qarashlarini aks ettiradi, deb taʼkidlagan.
Shu bilan birga, harakat vakili Ziyo Ahmad Takal Stanikzay kasalligi sababli taʼtilda ekanligini maʼlum qildi va ichki kelishmovchiliklar haqidagi mish-mishlarni inkor etdi. Biroq Stanikzayning “Tolibon”ning ayollarga nisbatan cheklov siyosatini tanqid qilishi harakat rahbariyati ichidagi ziddiyatlarni kuchaytirdi. Bu kelishmovchiliklar nafaqat “Tolibon”ning ichki barqarorligiga, balki uning xalqaro obroʻsiga ham tahdid solmoqda.
