Toshkent shahrining Chilonzor tumanidagi mahallalarda huquqni muhofaza qiluvchi organlar tomonidan maxsus “tashvish” tugmalari oʻrnatilmoqda, deb xabar berdi IIBB axborot xizmati.
Majmua xavf tugʻilganda Milliy gvardiya xodimlarini tezda yordamga chaqirish imkonini beradi. IIBB vakilining soʻzlariga koʻra, tugma bosilsa, huquq-tartibot idoralari xodimlari 6 daqiqa ichida voqea joyiga yetib boradi.
Qayd etilishicha, tugma yoniga videokuzatuv kameralari oʻrnatilgan boʻlib, undan foydalangan shaxsni koʻrish imkonini beradi. Bundan tashqari, barcha mahallalar hududida odamni yuzidan taniydigan maxsus kuzatuv kameralari oʻrnatilmoqda.
Eslatib oʻtamiz, bunday tugmalar Chilonzor va Shayxontohur tumanlaridagi uchta bozor hududida ham oʻrnatilgan.
