KPMG International hisobotiga koʻra, 2024-yilda fintech sanoatiga kiritilgan investitsiyalar hajmi soʻnggi yetti yildagi eng past darajaga tushib, 95,6 milliard dollarni tashkil etdi. 2023-yilga nisbatan tuzilgan bitimlarning umumiy hajmi 20,2 foizga, ularning soni esa 13,8 foizga kamayib, 4,6 mingtani tashkil etdi.
Tahlilchilar har uch turdagi moliyalashtirish hajmining pasayishini qayd etdilar: venchur investitsiyalari 11,8 foizga ($43,4 mlrd), birlashish va qoʻshib olish bitimlari 17,6 foizga ($49,6 mlrd) va fintechga toʻgʻridan-toʻgʻri investitsiyalar hajmi toʻrt baravar kamayib, $2,6 mlrd ni tashkil etdi.
KPMG pasayishning asosiy sabablarini makroiqtisodiy beqarorlik, geosiyosiy keskinlik va fintex bozorlari rivojlangan mamlakatlarda saylovlar oʻtkazilishi deb ataydi.
Biroq, barcha yoʻnalishlar ham salbiy dinamikani koʻrsatmadi. Toʻlov xizmatlariga investitsiyalar 80 foizga oshib, 31 milliard dollarni, kriptovalyuta loyihalarini moliyalashtirish esa 44 foizga oshib, 25 milliard dollarni tashkil etdi.
Umumiy pasayishga qaramay, 2024-yilning toʻrtinchi choragida venchur moliyalashtirish hajmi, shuningdek, qoʻshilish va sotib olish bitimlari uchinchi chorakka nisbatan sezilarli darajada oshdi. KPMG B2B segmentining oʻsishi va sunʼiy intellektni joriy etish orqali bozorning bosqichma-bosqich tiklanishini kutmoqda.
