O‘zbekistonning uchta hududida qariyb 100 kg giyohvand moddalarning noqonuniy aylanmasiga chek qo‘yildi. DXX matbuot xizmati bir vaqtning o‘zida uchta holat haqida ma’lumot berdi.
Reyd Surxondaryo viloyatidan boshlandi. Sariosiyo tumanida muqaddam sudlangan fuqaro mahalliy fermalardan birining noturar joyiga Tojikistondan kelgan narkokuryerlar tomonidan tashlab ketilgan 82 kg 478 gr "opiy" giyohvand moddasini yashirmoqchi bo‘lgan. U taqiqlangan moddalarni ko‘rsatilgan joyga olib borishi kerak edi, buning uchun xorijlik narkokuryerlar unga 2 ming dollar to‘lashgan.
Namangan viloyatida sintetik giyohvand moddalarni xatcho‘plar yordamida joylashtirmoqchi bo‘lgan yigit qo‘lga olindi. Tekshiruv davomida u qaynonasining uyida yashirin narkolaboratoriya tashkil qilgani aniqlangan. Mutaxassislar u yerda tintuv o‘tkazib, 9 kg 450 gr mefedronni musodara qilishdi, yana 595 gr sintetik giyohvand modda yashirin joylardan topildi.
Toshkentda qashqadaryolik ikki fuqaro Rossiyadan xalqaro pochta jo‘natmalari orqali boshqa tovar nomi ostida yuborilgan sintetik kannabinoidning o‘xshashi bo‘lgan Fluro-ADB moddasining 7 kg 313 grammini olayotgan vaqtda qo‘lga olindi. Ular moddani poytaxtdan Samarqand viloyatiga 500 dollarga yetkazib berishga rozi bo‘lgan.
Keyinroq Pastdarg‘om tumani hududida yana ikki yigit giyohvandlik vositasini olayotgan vaqtda qo‘lga olindi. Ulardan birining Samarqanddagi uyi ko‘zdan kechirilganda, yashirin sintetik giyohvand moddalar ishlab chiqaradigan laboratoriya borligi aniqlandi.
Holat yuzasidan Jinoyat kodeksining tegishli moddalari bilan jinoyat ishlari qo‘zg‘atilib, gumonlanuvchilar qamoqqa olingan. Tergov harakatlari olib borilmoqda.
