Kun.uz таҳририятига Бухорода вояга етмаган ёшларнинг тўйи бўлгани ҳақида видео келиб тушди. Мурожаатчининг сўзларига кўра, 29 июнь куни Бухоро вилоятининг Шофиркон туманидан бўлган 2008 йилда туғилган йигит ва Қоракўл туманидан бўлган 2007 йилда туғилган қизнинг тўйи бўлиб ўтган. Тўй базми шаҳардаги «Фатҳобод» маросимлар уйида ўтказилган.
Болалар омбудсмани Сурайё Раҳмонованинг маълум қилишича, ҳолат юзасидан унинг идораси ва ички ишлар органлари томонидан ўрганиш ишлари бошланган. Бу борада қўшимча маълумот берилади.
Оила кодексининг 15-моддасида никоҳ ёши эркаклар ва аёллар учун 18 ёш этиб белгиланган. Узрли сабаблар бўлганида, алоҳида ҳолларда (ҳомиладорлик, бола туғилиши, вояга етмаган шахснинг тўла муомалага лаёқатли деб эълон қилиниши (эмансипация), никоҳга киришни хоҳловчиларнинг илтимосига кўра туман, шаҳар ҳокими никоҳ ёшини кўпи билан 1 йилга камайтириши мумкин.
Маъмурий жавобгарлик тўғрисидаги кодекснинг 47-3-моддаси 2-қисмига кўра, ота-она ёки уларнинг ўрнини босувчи шахслар томонидан никоҳ ёшига етмаган шахсни эрга бериш ёхуд уйлантириш базавий ҳисоблаш миқдорининг 7 бараваридан 15 бараваригача миқдорда (2 млн 380 минг сўмдан 5 млн 100 минг сўмгача) жарима солишга сабаб бўлади.
Эслатиб ўтамиз, бир неча ой олдин Қашқадарё вилоятининг Косон туманида болалар омбудсмани 17 ёшли қизнинг режалаштирилган тўйини тўхтатганди.
Шунингдек, жорий йилнинг январь ойида Шаҳрисабз шаҳрида 17 ёшли қизни ҳимоя қилиш буйруғи чиқарилишига қарамай, уни мажбурлаб турмушга чиқишга таклиф этган йигит 10 суткага маъмурий қамоққа олинган.
