Astronomlar 2032-yil 22-dekabrda Yer bilan toʻqnashishi mumkin boʻlgan 2024 YR4 asteroidini aniqladi. Uning mavjudligi 2024-yil 27-dekabrda Chilida ATLAS rasadxonasining kuzatuvlari tufayli maʼlum boʻldi. Dastlabki hisob-kitoblar shuni koʻrsatadiki, uning diametri taxminan 70 metrni tashkil qiladi, bu esa Chelyabinsk meteoritidan 3-4 baravar katta.
Astronom Stas Korotkiyning RIA Novostiga maʼlum qilishicha, 33 kunlik kuzatuvlardan soʻng asteroidning Yer bilan toʻqnashish ehtimoli aniqlandi, bu turli hisob-kitoblarga koʻra 0,5 dan 6% gacha. Bu shuni anglatadiki, voqealar rivojlanishining 16 ta ehtimoliy ssenariylaridan biri asteroidning sayyoramizga tushishini nazarda tutadi. Biroq kuzatuvlarning qisqa davri va taxmin qilinayotgan voqeagacha boʻlgan katta vaqt oraligʻi tufayli prognozlarning aniqligi hozircha cheklangan.
Agar asteroid haqiqatan ham qulasa, uning qulashi ehtimoli Markaziy Afrika yoki Atlantika okeaniga toʻgʻri keladi. Quruqlikka urilganda, bu mahalliy halokatga olib keladi: binolar 30 km radiusda vayron boʻlishi mumkin.
Shu bilan birga, 2032-yil 22-dekabrda 2024 YR4 shunchaki Yerdan uchib oʻtish ehtimoli 94% va undan yuqori deb baholanmoqda. Hisob-kitoblarga koʻra, bu holda Yer markazidan asteroidgacha boʻlgan masofa taxminan 60 ming kilometrni tashkil qiladi — bu bunday hajmdagi obyektga juda yaqin. U uchib oʻtish paytida yorqinligi +10 yulduz kattaligiga yetadi va oʻrta teleskoplarda kuzatilishi mumkin.
Asteroidning trayektoriyasi haqidagi aniq maʼlumotlar 2028-2029-yillarga kelib, u Yerga yaqinlashganda, garchi oʻsha paytda xavfli yaqinlikda boʻlmasa ham, paydo boʻladi. Kuzatishlar uning orbitasini aniqlashga yordam beradi. 2024 YR4 Yer orbitasini kesib oʻtuvchi Apollon asteroidlari oilasiga mansub boʻlib, uning Quyosh atrofida toʻliq aylanishi toʻrt yil davom etadi.
