16 май куни Олмазор туман суди «Баха завхоз» ва «Терминатор» лақаблари билан танилган Баҳодир Султонов ва унинг шериги, навоийлик автосалон директори Ниёз Ибодовга нисбатан жиноий иш бўйича ҳукм чиқарди. Бу ҳақда суд қарорига таяниб UzNews.uz хабар бермоқда.
Маълумотларга кўра, фуқаролар Ўзбекистон Республикаси Жиноят кодексининг 165-моддаси 3-қисми «а» бандида (ўта йирик миқдорда товламачилик) назарда тутилган жиноятни содир этганликда айбдор деб топилди. Жиноят ишлари бўйича суд Баҳодир Султоновни ўта хавфли такрорий жиноят содир этган деб топиб, 10 йилга озодликдан маҳрум қилди.
Қайд этилишича, 55 ёшли Баҳодир Султонов 1994 йилда Жиноят кодексининг бир қанча моддалари билан ўлим жазосига ҳукм қилинган. Кейинчалик уни 20 йил муддатга озодликдан маҳрум этишга қарор қилинган.
